Ya Lateefu Lutf-o-Karam Karnay Wale Ke Wazaif

Allah Lateef hai kyoun keh woh apne bandon par meharbani karta hai. Un se narmi se paish ata hai. Us ke lutf-o-karam ka kya kehna us ne hakeemon ko hikmat se, ulma ko ilm se nawaza, salkon ko shoq diya Aulia ko wilayat se farfaraz kiya. Ambiya ko nabuwat se sarfaraz farmaya. Ahle takwa ko baseerat ata farmayi. Ahle Aqal shaur diya. Yani jo jis ke qabil tha usay usi kisam ki rehmat se nawaz diya. Us ke ilawa Lateef ka matlab itni bareek cheez hoti hai ke jo mehsoos ki ja sakay lekin pakri na ja sakay. Is meaning ke lihaz se bhi Allah Lateef hai kyoun keh woh aankh se nazar nahin ata aur na hath se chowa jata hai. Jese phool ki khushbu mehsoos tou hoti hai lekin pakri nahin jati. Jism ka saans mehsoos tou kiya ja sakta hai lekin dekha nahin ja sakta aur na hi hath se chowa ja sakta hai is liye Allah itna Lateef hai keh jism aur kon-o-makaan se munazzah hai. Us ki na had hai na intiha aur na hi hamari aqal us ka idrak kar sakti hai, magar jo usay is Ism se pukarta hai Allah us par apni latafat ke raaz ayaan karta hai. Ye Ism jamali hai aur is ke adad 129 hain.
Ya Lateefu ki fazilat hasb-e-zail hai.

Allah Ka Lutf-o-Karam

Ya Lateef - Aay Narmi Karnay Walay

1: Hasb-e-Mansha Shadi: Ye ism achi aur pasand ki shadi ke liye bohat mujarrab hai. Acha rishta milna khush bakhti ki daleel hai kyoun keh beshumar log shadi ke maslay main preshan hotay hain. Is preshani ka hal ye hai keh "Ya Lateefu" ko 40 din tak 12900 (barah hazar nau sau) martaba parhain. Insha'Allah mansha ke mutabiq rishta mil jaye ga. Aur marriage main khushi milay gi aur miyan biwi ka nibah baray khubsurat aur ehsan andaz se ho ga.


2: Har Hajat Aur Mushkil Ka Hal: Ye Ism mushkil kushai ke liye bohat mosar hai. Lihaza jo shuks is ism ko rozana 129 baar parhnay ka mamool bana lay tou Insha'Allah us ka har jaez kaam is Ism ki barkat se ho jaye ga. Aur agar har namaz ke baad isay 129 martaba parha jaye tou is ke asraat aur teez ho jayain gey. Deen aur dunya ki har hajat puri ho gi Aulia Karaam aur bazurgaan deen ne is Ism ki bohat tareef ki hai.

3:  Muflisi Aur Berozgari Ka Hal: Is Ism ki barkat se rizq main izafa hota hai. Fikar-o-faqah door hota hai . Agar kisi ka rozgar na ho tou usay rozgar mil jata hai. Mulazmat na milti ho tou mulaazmat mil jati hai. Agar amdani kam ho tou is se izafa ho jata hai is maqsad ke liye 16641 baar Ya Lateefu rozana parhain aur 40 din tak ye amal karain. Insha'Allah mandrajja bala maqasid bohat jald hasil hon gey.

4: Lailaj Bimari Ka Hal: Aisi Laailaaj bimari jo insan ka peecha na chorti ho is main is Ism ko 11 din tak 11000 baar parhain aur pani dum kar ke mareez ko rooz pilayain. Insha'Allah mareez ke shafayab honay ka zariya ban jaye ga. Aik aur amil ke qool ke mutabiq agar koi bimar is Ism ko 300 martabah is Ism ko 21 din tak parhay Insha'Allah tandrust ho ga.